أخبار أفريقية

خالد عز الدين يكتب بعنوان لا عسكروا عندنا ولا دفعنا ليهم حق المعسكر .

#سودانافوق

لا عسكروا عندنا ولا دفعنا ليهم حق المعسكر .
مرات كده التمريرة بتكون اجمل من الهدف .. ولالوب بلدنا اطعم من التفاح وريحة البمبان اجمل من الصندل .. ومرات كده الجرسة بتكون حلوه حلا .. البنات اتجرسوا غنوا لراجل المراه .. جرسه احلي من التأهل زاتو ..
أستمتعنا بهدف مكابي في مباراة الاهلي ولكن متعة تبريرات الشناوي والشمس كانت احلي .. ماشفتش يا اخوانا والنبي ما شفتش دي شمس السودان حاجة تانية غير .. شمس بالعربي اخير ليك من (صن) شمس الانجليزي حتي ولو كانت (داون) وداون داون اهلي القرن !! الشناوي من قال الشمس حرقتني تاني ما ضاق عافية .. جاتو ضربة شمس !! احتمال كبير يمشي يلعب في عين شمس !!
الهلال هزم الاهلي وهزم القطن رايح جاي زي ما بقولوا المصريين .. والاهلي انهزم من الهلال وتعادل مع الصن ونال اكبر هزيمة في هذه المجموعة حتي الان حتي القطن الذي لم يفز باي مباراة لم يتلقي الخمسة من صن داونز .. شركات الاتصالات في مصر بقت تغير من شبكة الاهلي .. الهلال لعب امام صن داونز وتلقت شباكه هدف وحيد بينما الاهلي (فتح) شباكه لابناء الشمس وحول الهزيمة الي نقاش حول (فتوح) صن داونز للهلال في امدرمان !
يفتحوا لينا لييه !! عملنا ليهم معسكر ولا دفعنا ليهم قروش طيارة ولا اجرنا ليهم فندق ولا اديناهم ملعب تدريبات ! مافي سبب بخلي صن داونز يفتح لينا نحن حمرة عين كده زي ما شلنا منك نقاطنا نشيلها من صن داونز .. فزنا عليهم بحقنا .. انتصرو علينا بحقو .. حتي ولو عايزين اتهزموا ده حقهم ! فريق عايز ينهزم نحن نقول ليهو شنو ؟ انتو بتقولوا صن داونز عايز ينهزم عشان يبعد الاهلي !! يا سبحان الله .. هو يبعد الفريق الفائز عليه بهدف وحيد ولا الفريق الطوالي بغلبوا بالخمسة !! صن داونز لو بفكر كده مفروض طوالي يسوق معاهو الفريق البغلبوا خمسة وخميسة في عين اللي ما يصلي علي النبي !
نحن ما بنشتري اندية ولا حكام ولو كنا بنعرف الكلام ده من زمان كان الاهلي هسة عندو بطولة ولا بطولتين علي الاكثر .. كنا شلنا خمسة بطولات علي الاقل واولها بطولة 87 يا اهلي لاراش يا بتوع الحكام انتو !
عايزين تتحدثوا عن نزاهة المنافسة وانتو بتستضيفو فريق منافس ليكم في منافسة ! عايزين تتكلموا عن تامر الهلال عليكم وانتو من تامرتم علي الهلال في الموسم الماضي وغشيتوا حتي الفريق اللي اتعاون معاكم عشان الهلال يطير ويدخلوا معاكم .. قلت ليهم ما بنخش برانا .. رجعوا يقولوا ما بنطير برانا !!
عن اي عدل يتحدث عادل العيقي وهو شاهد العصر علي تاريخ الاهلي الذي هزم الترجي في مباراة التحكيم الشهيرة ولكن الترجي رد له الصاع صاعين عندما احرز مهاجمه هدفا واضحا باليد احتسبه الحكم وكأنه يقول لعادل العيقي هذه بتلك .. اما الهلال عندما تم استفزازه في القاهرة وشراء الحكم الذي تجاهل (دفرة) فلافيو لعمار مرق فقد عاد لارضه وحمل كفن الحضري وطافت به الجماهير حول الملعب لتاكيد القوة ودفن الجبروت الاحمر هنا في المقبرة !
هزمناكم بثلاثية وعلمناكم ان الهلال كبير هذه الارض لا يقبل الاهانة والظلم ..
فريق مهزوم من خصومه يريد ان يصعد علي حساب الاخلاق والقيم والنبل .. الم اقل لكم ان الاهلي يتحدث عن الاخوة والصداقة والنيل قبل مباريات الهلال في امدرمان .. الم اقل لكم ان الدبلوماسية الشعبية والرسمية يذكرونها فقط قبل مباراة الاهلي في امدرمان .. لماذا لا يتمني الاهلي صعود الهلال باسم وادي النيل كما يقولون ؟ لماذا اختفت فجأة الاخوة والصداقة والموية الواحدة والنيل الواحد .. لماذا تحولت ارض امدرمان من شقيقة بلادي كما يقول الكابلي الي عدو يريدون من صن داونز الجنوب افريقي ان يهزمه في ارضه ليمهد الطريق لفريق عجز عن الفوز علي صن داونز في القاهرة وتم قهره بامتياز في جنوب افريقيا ارض مانديلا محرر العبيد وقاهر التفرقة العنصرية يا عنصريي الاعلام العربي .. لماذا الحديث عن مباراة الهلال وصن داونز بهذه الطريقة اليس الهلال بفريق عربي !!
هي كرة قدم وهذا قانونها فالفريق الذي يريد ان يصعد عليه ان ياكل من يديه .. والهلال ان لم ينتصر علي صن داونز او يتعادل او يفوز علي الاهلي فلا يستحق الصعود .. لسنا في حالة حرب نعم ولكننا ندافع عن حقوقنا ضد هذا الظلم والكذب والكبرياء .. ماذا لو خرج الاهلي من دور المجموعات .. هل ستتوقف الدنيا يا مصر ام الدنيا ام ان الهلال السوداني لا يستحق ان يكون مع الكبار وهو الذي عرف هذه البطولة قبل ان يعرفها الاهلي بسنوات ..
جرسة الاهلي احلي من هزيمته .. ورجفة الاعلام المصري واراجيفه اجمل من الفوز علي صن داونز وكشف المشاعر الحقيقية للذين يحاولون ان يغطوا علي مشاعرهم بالحديث المنمق مثل عدلي القيعي لها قيمتها عندنا مثل الفوز علي صن داونز والاهلي وتصدر هذه المجموعة ..
بين الهلال وصن داونز مباراة في الملعب فالهلال لا يشتري المباريات وصن داونز لا يبيع ولكن الذي وضع نفسه في هذا الموقف الصعب هو من يخلق الاكاذيب ..
نحن في هذه المقبرة اكبر من الاهلي وصن داونز وكل عتاولة افريقيا .. بطلوا جرس وركزوا في القطن حتي لا تتحول مباراتنا امام الصن الي مباراة ودية فنفقد متعتها !!


Post Views: 17

مقالات ذات صلة

زر الذهاب إلى الأعلى